బీరకాయను ఎన్నో రకాలుగా వాడుకోవచ్చు. కూరలు, పప్పులు.. అలాగే పచ్చిముక్కలు కూడా ఆరోగ్యానికి మంచిది. బీరకాయను అచ్చంగా అలాగే కాకుండా సెనగపప్పు కలిపి వండితే చాలా రుచిగా ఉంటుంది. దీనికి కాస్త మసాలాలు ఎక్కువగా కలిపితే అదిరిపోతుంది. మాంసాహారంకు తీసిపోదు.
కావలసిన వస్తువులు :
బీరకాయలు – 250 gms
సెనగపప్పు – 100 gms
ఉల్లిపాయ -1
పసుపు -1/4 tsp
కారంపొడి – 1 tsp
ఉప్పు – తగినంత
అల్లం వెల్లుల్లి పేస్ట్ – 1 tsp
గరం మసాలా పొడి-1/2tsp
కరివేపాకు -1 రెబ్బ
నూనె – 3 tbsp
సెనగపప్పును కడిగి నీళ్లు పోసి కనీసం అరగంట నాననివ్వాలి. బీరకాయలు చెక్కు తీసి చిన్న ముక్కలుగా కట్ చేసుకోవాలి. ప్యాన్ లో నూనె వేడిచేసి సన్నగా తరిగిన ఉల్లిపాయలు వేసి మెత్తబడేవరకు వేయించాలి. ఇందులో పసుపు, కరివేపాకు,అల్లంవెల్లుల్లి పేస్ట్,కారంపొడి వేసి రెండు నిమిషాలు వేయించాలి. సెనగపప్పు నీళ్లు ఓడ్చి, ఇందులో వేసి తడి పోయేవరకు వేయించాలి. బీరకాయ ముక్కలు, తగినంత ఉప్పు వేసి బాగా కలియబెట్టి మూతపెట్టాలి. ముక్కలు మగ్గినతర్వాత కప్పు నీళ్లు పోసి చిన్నమంటపై ఉడికించాలి. పప్పు ఉడికి దగ్గర పడ్డాక గరం మసాలా కలిపి దింపేయాలి. సన్నగా తరిగిన కొత్తిమిర చల్లి వడ్డించాలి. ఈ కూర చపాతీలు అన్నంలో చాలా బావుంటుంది. చాలా త్వరగా ఐపోతుంది కూడా.
12:43 pm on May 2nd, 2010 1
ఈ కూర చాలా బాగుంధి నెను ఒక రొజు చెసాను అంధరికి నచింధి