అందరికి అనుభవమైన విషయమే ఇది. ఎండాకాలంలో పోటీపడుతూ మండిన కూరగాయల ధరలు ఇంకా చల్లబడనంటున్నాయి.  అసలు రోజూ ఏం కొనాలో అర్ధం కావట్లేదు. వెచ్చాల ధరలు పెరిగాయి, మరి మేము ప్రియమైతే తప్పేంటి అని హుంకరిస్తున్యాయి కూరగాయలన్నీను. విసుగొచ్చి ఏం చేయాలో అర్ధం కాకుంటే ఉల్లిపాయలు కనిపించాయి. వాటి ధర పర్లేదు. వాటితోనే పచ్చడి చేస్తే పోలా అని ప్రయత్నించా. రుచి బావుండింది. సగంపైగా నేనే తినేసా. ఇంట్లోవాళ్లకి అసలు అది ఏం పచ్చడో అస్సలు అర్ధం కాలేదు నేను చెప్పేవరకు..

కావలసిన వస్తువులు :

సన్నగా తరిగిన ఉల్లిపాయలు – 1 కప్పు( 3)

ఎండుమిరపకాయలు – 5

ధనియాలు – 2 tbsp

జీలకర్ర – 1 tsp

ఆవాలు – 1/4 tsp

పల్లీలు – 3 tbsp

నువ్వులు – 1 tbsp

పసుపు – 1/4 tsp

కరివేపాకు – 2 రెబ్బలు

చింతపండు పులుసు – 1/4 కప్పు

ఉప్పు – తగినంత

నూనె – 4 tbsp

ముందుగా ప్యాన్ వేడి చేసి ఎండుమిరపకాయలు , జీలకర్ర, ధనియాలు, పల్లీలు, నువ్వులు వేసి దోరగా వేపాలి. అవి తీసివేసి రెండు చెంచాల నూనె వేసి సన్నగా తరిగిన ఉల్లిపాయలు వేసి మెత్తబడేవరకు వేయించాలి. మిరపకాయలు, జీలకర్ర, పసుపు, ఉప్పు, ధనియాలు, పల్లీలు, నువ్వులు  మొదలైనవి మెత్తగా గ్రైండ్ చేసుకోవాలి. ఇందులో వేయించిన ఉల్లిపాయలు, చింతపండు పులుసు వేసి మళ్లీ మెత్తగా అయ్యేవరకు గ్రైండ్ చేసుకోవాలి. చిన్న గరిటెలో మిగిలిన నూనె వేడి చేసి ఆవాలు, జీలకర్ర వేసి చిటపటలాడాక కరివేపాకు కూడా వేసి రెండు నిమిషాల తర్వాత రుబ్బి  పెట్టుకున్న పచ్చడిలో కలపాలి. అంతే చాలా త్వరగా తయారైపోయింది రుచికరమైన ఉల్లిపాయ పచ్చడి. అన్నం, చపాతీ, దోసెల్లోకి కాస్త వెరయిటీగా వడ్డించండి.  తినేవాళ్లకు చివరలో అది ఏ పచ్చడో చెప్పాలని చెప్పండి. చూడండి ఎంతమంది చెప్పగలరో??

Read this post in English: